Sólorkurikin tvíkilja vitjar í Havn

Sólorkurikna tvíkiljan, Energy Observer, hevur seinastu dagarnar ligið við bryggju í Havn. Umhvørvisvinarliga tvíkiljan hevur einki CO₂ útlát og er í løtuni á rannsóknarferð kring heimin. Tvíkiljan er partur av einari størri verkætlan, ið hevur til endamáls at fáa kolevni úr sjóvinnuni og at vísa, at tað ber til tøkniliga.

Elsa Berg, borgarstjóri, vitjaði umborð í dag og bjóðaði manningini vælkomnari til Havnar.

Marin Jarry, skipari

At stíga umborð á eina tvíkilju, sum siglir við 100% varandi orku vísur okkum ítøkiligu umleggingina til varandi orkukeldur. Tað hevur stóran týdning og sigur okkum so mikið sum, at framtíðin er longu her - Elsa Berg.

Talan er um eitt rannsóknarskip, ið framleiðir og goymir sína egnu orku. Energy Observer hevur - umframt vindsegl - sólpanelir um alt skipið, ið er gjørt soleiðis, at eisini ber til at ganga á teimum og við sólorku, vindorku og egnari framleiðslu av hydrogeni kann skipið sigla uttan útlát av CO₂.

Energy Observer er ein sterk áminning um, at loysnirnar til ta grønu umleggingina bæði eru tøkar og rigga. Tøknin er longu í nýtslu og verður framhaldandi ment, soleiðis at skip og bátar í øllum støddum kunnu verða rikin við varandi orkukeldum. Tað er hugtakandi at síggja, hvussu væl tað longu ber til. - Elsa Berg.

Energy Observer verður væntandi í Føroyum fram til sunnudagin, tá leiðin gongur víðari til Íslands.