Súkkludagur í góðum veðri

Altjóða súkkludagur var mikudagin. Miðbýurin bleiv stongdur fyri bilum í nakrar tímar, og so sluppu súkklurnar at eiga vegirnar eina løtu.

Nógv børn høvdu tikið súkkluna oman í býin, og tey hugnaðu sær óført saman við Angelu og Hannibal hetta stilla summarkvøldið, har øll motorljóð hvurvu úr miðbýnum í nakrar tímar.

ST samtykti í 2018, at 3. juni skal vera altjóða súkkludagur. Hetta varð gjørt fyri at viðurkenna, hvussu súkklan gjøgnum tvær øldir hevur verið eitt hent og fjølbroytt amboð hjá menniskjum, og at súkklan er ein einfaldur, bíligur, álítandi, umhvørvisvinaligur og burðardyggur máti at flyta seg.