Tíðindi

Nú frá 1. juli at rokna er Mortan Simonsen settur í starv sum fíggjarleiðari í Tórshavnar kommunu.

Tømingin av grøna ílatinum (papp og pappír) koyrir sum vanligt eftir álmanakkanum aftaná verkfallið. Hetta merkir, at tey, sum ikki fingu tømt grøna ílatið undir verkfallinum, mugu bíða til næstu ferð grøna ílatið skal tømast sambært álmanakkanum.

Fjarhitaarbeiðið á Frælsinum dregur út, og tí verður vegurin ikki opin fyri gjøgnumkoyrandi ferðslu fyrr enn mánadagin 22. juli klokkan 6. Í hesum tíðarskeiðnum koyrir leið 1 ikki eftir Frælsinum, men eftir J. C. Svabos gøtu og Fríðriks Petersens gøtu.

Ein meiriluti í Tórshavnar býráð samtykti á býráðsfundi í kvøld leigusáttmálan millum Tórshavnar kommunu og Almanna- og mentamálaráðið um økið at staðseta nýtt tjóðleikhús.

Fleiri dagstovnar hjá Tórshavnar kommunu lótu aftur, tá verkfall var. Hesa tíðina høvdu foreldur ikki møguleika at fáa børn á stovn, og rindaðu tískil fyri eina tænastu, sum tey ikki fingu. Tórshavnar Býráð hevur í kvøld samtykt at endurrinda dagstovnagjald, sum varð rindað, tá stovnar lótu aftur vegna verkfall.

Nýtt tún verður nú gjørt uttanfyri Svimjihøllina í Gundadali. Sáttmálin varð í dag undirritaður við felagið Múrskeiðina um at gera arbeiðið. Tað vóru Heðin Mortensen, borgarstjóri í Tórshavnar kommunu, og Hallur Danielsen, stjóri í Múrskeiðini, ið skrivaðu undir sáttmálan.

Ert tú millum 14 og 18 ár, og vilt tú læra at gera film? So tekna teg til Nóllywood, sum er árligi summarskúlin fyri ung, ið eru áhugað í filmi. Nóllywood verður 8. til 15. juli í Nólsoy. 

Skalt tú hava tiltak við í ólavsøkuskránna, mást tú minnast til at senda tilfar til ólavsøkuskránna áðrenn 1. juli 2024.

Í dag byrjaði fjarhitagrevstur tvørturum vegin beint við rundkoyringina á Frælsinum. Arbeiðið hevur við sær, at eingin gjøgnumkoyring verður úr og til Jóanesar Paturssonar gøtu tvørturum rundkoyringina á Frælsinum. Ferðsluavmarkingin er galdandi frá mánadegnum 24. juni til mánadagin 1. juli klokkan 8, og í hesum tíðarskeiðnum koyrir leið 1 ikki eftir Frælsinum, men eftir J.C. Svabos gøtu.

Fleiri broytingar eru seinastu árini gjørdar í bussleiðini. Í 2008 gjørdist tað ókeypis at nýta buss, í 2011 øktist túratalið, í 2019 øktist túratalið uppaftur meira og bussarnir fóru aftur at koyra bæði leygardag og sunnudag í Havn. Í fjør komu tveir elbussar uppí busshópin.