Tíðindi

1.apríl er freistin at søkja stuðul úr grunninum Nuuk, Reykjavík, Tórshavn. Endamálið við grunninum er at styrkja samstarvið og fatanina millum politikarar og borgarar í Tórshavnar kommunu, Nuuk, og Reykjavík.

Umsøkjarar, ið fáa stuðul úr grunninum, skulu birta undir samstarvið millum býirnar.

Mikudagin 27. mars 2024 verður ástaðarfundur í sambandi við, at Tórshavnar kommuna er í ferð við at seta skeltir upp við høvuðsútrensl sambært spillivatnskunngerðini. Fundurin verður hildin við Føroya Sjósavn mikudagin 27. mars kl. 10. Eigarar, brúkarar ella onnur, ið hava rættindi til lunnindini í fjøruni, kunnu møta á staðnum.

Í gjárkvøldið hevði manningin og sluppstuðlarnir hjá Westward Ho eina hugnaløtu við døgurða í Müllers Pakkhúsi. Heðin Mortensen, borgarstjóri, beyð vælkomin. Á móttøkuni handaðu íslendsku Óðins Vinir eitt kort við yvirliti yvir øll føroysk skip, sum fórust undir Íslandi millum 1870 og 1993.

Stuðuls- og páskatiltak hevur verið hjá Tórshavn Boksing í dag inn á Hjalla 12. Boksarar hava víst venjingar og sparringar. Í sambandi við dagin vitjaði borgarstjórin eisini inn á gólvið.

Katrin varð í dag heiðrað við silvurheiðursmerki Tórshavnar kommunu á hugnaløtu á URD, har hon hevur starvast síðan upplating – samanlagt hevur hon starvast hjá kommununi í meira enn 36 ár. 

Tveir 30 ára starvsdagar. Tí Asbjørg Jacobsen og Aimi Lund Gjógvará hava arbeitt hjá Tórshavnar kommunu í meira enn 30 ár. Men hildnir vórðu eisini tveir 10 ára starvsdagar í dag hjá Hallu Andreasson og Silviu Láberg Mohr.

Í 55 ár hevur Býarbókasavnið verið ein umráðandi partur av Tórshavnar kommunu. 1. apríl 1969 varð Býarbókasavnið sett á stovn, og síðani tá hevur savnið verið ein sera virkin partur av Havnini og Tórshavnar kommunu.

Tórshavnar Kommuna hevur í dag undirskrivað sáttmála við PM Pluss í samband við reingerð av kommunulæknahølum í Tórshavnar Kommunu.

Tórshavnar býráð samtykti í gjárkvøldið at upploysa Grunn Jóhannes Nolsøes, skraddara, og lata fæið í grunninum til Kvinnuhúsið.

Tilsamans er talan um umleið 2,2 milliónir krónur. Peningurin verður útgoldin, tá grunnmynduleikin endaliga hevur góðkent, at grunnurin verður upploystur.

Hesa vikuna hava umboð fyri norðurlendskari verkætlan vitjað í Havn við luttakarum úr Finnlandi, Íslandi, Svøriki og Írlandi.