Byggimálsviðgeri til Byggimálsdeildina
Søkt verður eftir starvsfólki til Byggimálsdeildina, at byrja skjótast til ber.
Byggimálsdeildin er ein myndugleikadeild, sum viðgerð og avgreiðir umsóknir um byggiloyvir, útstykkingarloyvir og kommunal matrikkulmál. Harumframt hevur deildin eftirlit við, at bygging fer fram eftir galdandi byggiloyvum.
Á byggimálsdeildini starvast 10 fólk. Deildin er partur av teknisku fyrisitingini, sum heldur til í gamla bankabygninginum í Steinatúni í Havn.
Tínar høvuðsuppgávur verða at arbeiða við byggimálsviðgerð og kemur tú at hava nógv samskifti við hini í fyrisitingini og við borgarar sum venda sær til kommununa.
Talan er um eitt áhugavert starv, har tú kemur at arbeiða saman við nógvum dugnaligum starvsfólkum og har tú fært góðar møguleikar at hava ávirkan og at menna teg fakliga.
Førleikakrøv
Tú skalt vera byggifrøðingur, byggitøkningur, ella hava aðra líknandi útbúgving og tað er ein fyrimunur, um tú eisini hevur royndir innan byggimálsviðgerð og fyrisiting.
Harumframt skalt tú:
- duga væl at skriva- og at orða teg á føroyskum
- duga at arbeiða við ArcGis ella líknandi kortskipan
Persónligir eginleikar
Umráðandi er, at tú ert jaligur og fyrikomandi, dugir væl at leggja arbeiðið til rættis og kanst arbeiða bæði sjálvstøðugt og saman við øðrum. Harumframt skalt tú hava lætt við at samskifta við onnur.
Setanarviðurskifti
Starvið verður sett við løn og setanartreytum sambært avvarðandi sáttmála og Kommunala Arbeiðsgevarafelagið ella Fíggjarmálaráðið.
Um tú ynskir at vita meira
Meira fæst at vita um starvið við at venda tær til Marius Müller, deildarleiðara á Byggimálsdeildini, telefon 21 53 09 ella teldupost marius@torshavn.fo
Umsókn
Umsókn, saman við upplýsingum um útbúgving, CV og møguligum tilvísingum, skal verða okkum í hendi í seinasta lagi týsdagin 21. mai 2024.
Tú søkir starvið við at trýsta á grøna knøttin »Søk starvið« í vinstra bredda.