Persónsupplýsingapolitikkur

Tórshavnar Kommuna viðger persónsupplýsingar um teg í samband við tær uppgávur, ið vit sum kommuna skulu loysa. Tað kann vera ein tænasta, sum tú hevur rætt til at fáa á til dømis heilsu- og umsorganarøkinum ella á øðrum økjum. Tað kann eisini vera, at vit hava eina rættarliga skyldu at viðgera tínar persónsupplýsingar, ella vit hava gjørt eina avtalu við teg, sum inniber, at vit hava tørv á tínum upplýsingum. 

Grundarlagið undir heimildini er sostatt, at TK hevur eina rættliga skyldu at viðgera tínar persónsupplýsingar, ella at viðgerðin er partur av okkara myndugleikaútinnan. Tað kann eisini vera, at vit hava umbiðið og fingið eitt samtykki frá tær til viðgerð av tínum upplýsingum.

Hvørjar upplýsingar vit hava tørv á, veldst um hvat endamálið er við tí myndugleikauppgávu, sum vit skulu loysa. Vit innsavna einans upplýsingar, sum eru neyðugar fyri at vit fáa viðgjørt títt mál.

Tað er sostatt § 8, stk. 1, nr. 1, 3 ella 5, umframt § 11, stk. 2, nr. 1, 2 ella 7, í Dátuverndarlógini, sum er lógliga viðgerðarheimildin fyri okkara innsavnan og viðgerð av tínum persónsupplýsingum.

Um vit innsavna ella seinni viðgera tínar upplýsingar til hagfrøðilig endamál, verður tað gjørt innanfyri rammurnar av § 7, stk. 3, í Dátuverndarlógini.

Nýggju Dátuverndarlógina finnur tú her:

Dátuverndarlógin (logir.fo)

Vit innsavna tínar persónsupplýsingar á ymiskan hátt.

Í nógvum førum er neyðugt hjá Tórshavnar Kommunu at innheinta upplýsingar um teg, til dømis um vit skulu viðgera eitt mál. Tað kunnu vera upplýsingar frá øðrum almennum myndugleikum ella úr felagsskráum hjá til dømis TAKS ella fólkayvirlitinum. Í øðrum førum biðja vit um upplýsingar, tá tú vendir tær til okkara ella brúkar eina sjálvvirkandi loysn.

Í øðrum førum fáa vit upplýsingar um teg frá øðrum. Tú kanst til dømis vera sonevnt »eykafólk« í einum máli, um tú ert avvarðandi at tí persóni, málið snýr seg um, ella tú kanst vera partur í einum máli, sum onkur annar hevur lagt fyri kommununa.

Tú hevur altíð rætt til at vita, hvaðani vit innsavna upplýsingar um teg.

Í summum førum lata vit tínar persónsupplýsingar víðari. Tað kann vera til aðrar almennar myndugleikar, aðrar kommunur, ráðgevar, grannskoðarar, advokatar v.m.

Í summum førum mugu vit, sambært fyrisitingarlógini ella lóg um alment innlit, víðarilata upplýsingar um teg.

Vit nýta eisini í summum førum dátuviðgerar, sum hjálpa okkum við at viðgera tínar upplýsingar á góðan og tryggan hátt. Tað kann m.a. vera goymsla av persónsupplýsingum, ella um vit fáa hjálp frá uttanhýsis ráðgevum til málsviðgerð.

Tórshavnar Kommunu nýtir ikki, sum útgangsstøðið, veitarar ella dátuviðgerar, sum halda til uttan fyri ES/EBS (triðjalond). Hetta kann tó koma fyri í einstøkum førum.

Um so er at vit flyta tínar upplýsingar uttanfyri ES/EBS, fara vit altíð at tryggja okkum nøktandi heimildargrundarlag fyri flutninginum – hetta merkir, at vit tryggja okkum, at verndarstøðið av tínum upplýsingum er nøktandi.

Hvussu leingi vit goyma tínar persónsupplýsingar veldst um, hvussu leingi vit hava tørv á teimum til at røkja okkara myndugleikauppgávur.

Tá ið vit ikki hava tørv á upplýsingunum longur, verður støða tikin til varðveitslu ella striking av tínum upplýsingum. Treytað av skjalasavnslógini, skulu upplýsingarnar í ávísum førum flytast Tjóðskjalasavninum.

Í Tórshavnar Kommunu menna vit áhaldandi, hvussu vit á besta hátt tryggja, at tínar upplýsingar eru goymdar trygt. Um upplýsingarnar eru elektroniskar, verða tær goymdar í tryggari skipan. Hetta er galdandi bæði fyri upplýsingar, vit sjálvi savna inn og fyri upplýsingar, vit fáa frá tær í sambandi við eitt mál.

Í deildum har málsviðgerðin ikki er elektronisk, tryggja vit, at deildirnar hava møguleika fyri at steingja upplýsingarnar inni og hava eina trygga mannagongd fyri, at bert viðkomandi starvsfólk hava atgongd til upplýsingarnar.

Á heimasíðuni hjá føroyska dátueftirlitinum finnur tú fleiri upplýsingar um dátutrygd og verju av persónsupplýsingum.

Heimasíðan hjá Dátueftirlitinum (dat.fo)

Tú hevur rætt til at fáa at vita, hvørjar upplýsingar kommunan hevur um teg.

Fyri at vit á besta hátt kunna viðgera tína umbøn, heita vit á teg, í sambandi við eina umbøn, um at greiða okkum frá, hvat øki í kommununi tú hevur havt samband við, til dømis heimahjálp, dagstovnur, skúli v.m. So er lættari hjá okkum at finna upplýsingarnar fram.

Um okkara viðgerð av tínum persónsupplýsingum er grundað á samtykki frá tær, hevur tú altíð rætt til at afturkalla títt samtykki. Tá ið tú afturkallar títt samtykki, steðga vit at viðgera tínar persónsupplýsingar, sum var grundað á samtykki.

Tú hevur rætt til at biðja um at fáa rættað persónsupplýsingar, sum eru rangar ella villleiðandi, soleiðis at vit ikki viðgera upplýsingar um teg, sum eru skeivar ella ófullfíggjaðar.

Í serligum føri hevur tú rætt til at biðja um at fáa strikað persónsupplýsingar, sum vit hava um teg. Rætturin er ikki treytaleysur, tá ávísir upplýsingar ikki mugu strikast grundað á aðra lóggávu, ella um avtala og ávíst endamál gevur kommununi rætt til at varðveita og viðgera persónsupplýsingarnar.

Tú kanst átala, at persónsupplýsingar um teg verða viðgjørdar. Um átalan má metast heimilað, skulu persónsupplýsingarnar um teg ikki viðgerast. Tó kunnu upplýsingarnar møguliga framvegis nýtast til at viðgera møgulig onnur lóglig endamál.

Í serligum føri hevur tú rætt til at biðja um at fáa viðgerðina av tínum persónsupplýsingum avmarkaða. Hetta merkir, at um treytirnar til viðgerðaravmarking eru uppfyltar, so kunnu vit einans viðgera tínar persónsupplýsingar í serligum førum.

Tú hevur altíð møguleika at klaga til Dátueftirlitið, um tú ert ónøgd við okkara viðgerð av tínum persónsupplýsingum.

Tú finnur sambandsupplýsingarnar á heimasíðuni hjá Dátueftirlitinum.

Heimasíðan hjá Dátueftirlitinum (dat.fo)