Finn búpláss til eldri

Á hesari síðuni sært tú yvirlit yvir eldrabústovnarnar í Tórshavnar kommunu. Í kommununi eru fýra røktarheim, trý eldrasambýli og eitt ellisheim. Búpláss til borgarar við røktartørvi eru á øllum bústovnunum.

Ellisheimið og eldrasambýlini hava felags stovu og smá búrúm. Flestu heimini hava eitt vesi við brúsu til 3-4 búfólk.

Røktarheimini eru størri heim, ið eru býtt upp í fleiri smærri deildir. Búfólk hava egið vesi við brúsu, og hvør deild hevur eitt felagshøli. Flestu røktarheimini hava bæði røktardeildir og demensdeildir.

Borgarar við demenssjúku kunnu fáa búpláss á eldrasambýlinum oman Mattalág, á Heiminum við Vallalíð, á Boðalon á Boðanesheiminum, í Handarastovu á Lágargarði og í Kristianslon á Tjarnagarði. Starvsfólk á hesum heimum og deildum hava servitan innan demens, og flestu búeindirnar eru serliga innrættaðar til at taka hædd fyri tørvinum hjá demenssjúkum.

Á kortinum niðanfyri sært tú, hvar røktarheimini eru í kommununi. Røktarheim eru víst við bláum frámerki og eldrasambýli við reyðum frámerki. Tey røktarheim og eldrasambýli, sum eisini bjóða búpláss til borgarar við demenssjúku, eru víst við einum »d«. 

Á listanum niðanfyri finnur tú eitt yvirlit yvir allar bústovnarnar í kommununi, ið bjóða eldri borgarum búpláss. Trýst á »vís búpláss«, so sært tú, hvat einstaka heimið bjóðar sínum búfólkum, og hvussu nógvum búfólkum heimið hevur pláss fyri. Tú kanst eisini leita tær yvirskipaða kunning á síðu okkara um eldrabúpláss.

Um eldrabúpláss