Hevur tú tørv á heimarøkt?

Vit veita tvey sløg av heimarøkt:

• Tíðaravmarkaða heimarøkt
• Varandi heimarøkt

TÍÐARAVMARKAÐ HEIMARØKT

Tíðaravmarkað heimarøkt er til tín, sum vegna sjúku hevur tørv á persónligari ella handaligari hjálp, og sum væntar at gerðast sjálvhjálpin aftur.

Vit veita heimarøktina við støði í tínum førleikum og í teimum funktiónum, sum hava týdning fyri teg. Sostatt er heimarøktin eitt samstarv millum teg og okkum við tí endamáli, at tú eftir heimarøktina fært klárað teg við minni ella ongari hjálp.

Tíðaravmarkaða heimarøktin virkar á tann hátt, at ein ergo- ella fysioterapeutur kemur á heimavitjan hjá tær. Saman seta tit mál fyri, hvussu tú við venjing kanst koma fyri teg. Venjingin kann til dømis skipast soleiðis, at tú saman við okkum venur teg at lata teg í sjálv, smyrja breyð ella at gerast gongufør aftur.

VARANDI HEIMARØKT

Varandi heimarøkt er til tín, sum ikki megnar, ella lutvíst megnar, at taka tær av tíni persónligu røkt í gerandisdegnum og tí hevur tørv á varandi heimarøkt fyri at fáa ein góðan gerandisdag. Endamálið við heimarøktini er at hjálpa tær at vera so sjálvbjargin, sum gjørligt.

Áðrenn vit veita heimarøktina, kemur ein visitator heim til tín og ger sær eina meting um tín tørv á hjálp og røkt. Hjálpin og røktin, tú fært, er tengd at tínum tørvi og kann til dømis vera hjálp til persónligt reinføri, matgerð, at vaska klæði, at reiða song upp og hjálp við heilivági.

Alla heimarøktina, sum vit veita í Heilsu- og umsorganartænastuni, veita vit sambært Lógtingslógini um heimatænastu og eldrarøkt.

Lógin um heimatænastu og eldrarøkt (logir.fo)

Tú kanst fáa heimarøkt, um tú ikki megnar ella hevur trupult við at taka tær av tíni persónligu røkt og handaligum uppgávum heima. Heimarøktin kann til dømis vera hjálp til at vaska klæðir, bíleggja vørur, borðreiða ella skifta á songini.

Avgerðin um hjálp byggir á eina samrøðu, sum ein visitator hevur við teg. Út frá smarøðuni lýsa vit og skjalprógva vit tínar førleikar og møguligan tørv á hjálp. Tað vil siga, at vit veita tær heimarøktina við støði í tínum tørvi. Tí ber ikki til at siga frammanundan, hvørja hjálp tú fært.

Ert tú fólkapensjónistur, er tað Heilsu- og umsorganartænastan, sum veitir hjálpina.

Ert tú yngri enn 67 ár, er tað Almannaverkið, sum metir um tín tørv á endurvenjing, meðan Heilsu- og umsorganartænastan veitir tær persónliga heimarøkt í tøttum samstarvi við Almannaverkið.

Ynskir tú at søkja um heimarøkt, kanst tú ringja ella senda ein teldupost til móttøkuna í Heilsuhúsinum í Hoyvík.

HEILSUHÚSIÐ Í HOYVÍK

Brekkutún 1 
188 Hoyvík

Tel. 30 20 00 (mánadag til hósdag kl. 8 – 15.30 og fríggjadag kl. 8 – 15)

heilsuhúsid@torshavn.fo

Tá tú vendir tær til móttøkuna í Heilsuhúsinum, senda vit eina áheitan til ein visitator, sum setur seg í samband við teg. Tú og tíni avvarðandi avtala síðan eina heimavitjan við viðkomandi.

Undir heimavitjanini lýsa og skjalprógva vit tín tørv, tínar førleikar og tíni ynski. Saman meta vit um møguleikan fyri, at tú við venjing ella hjálpartólum kann gerast meira sjálvhjálpin. Síðan leggja vit tíðaravmarkaðu heimarøktina til rættis í samráð við teg.

Tá heimarøktin er løgd til rættis, venur tú saman við starvsfólkum úr okkara toymi, sum fevnir um ergoterapeutar, fysioterapeutar, sjúkrarøktarfrøðingar og starvsfólk úr heimarøktini. Seinni meta vit um tín tørv á varandi heimarøkt.

Heimarøktin, vit veita, er altíð tengd at tínum tørvi og førleikum.

Ja. Tú rindar fyri heimarøktina sambært Kunngerðini um heimatænastu og gjald fyri heimatænastu.

Tín inntøka og hjúnastøða ger av, hvussu nógv tú rindar. Niðanfyri sært tú, hvussu vit rokna títt gjald.

ERT TÚ STAKUR PENSJÓNISTUR

Ert tú stakur pensjónistur, rokna vit títt gjald soleiðis:

• Er inntøkan lægri enn 15.000 kr., er eingin kostnaður
• Er inntøkan millum 15.000 kr. og 20.000 kr., rindar tú 30 kr. fyri hvønn tíma
• Fyri hvørjar 5.000 kr., inntøkan er hægri enn 20.000, rindar tú 3 kr. eyka fyri hvønn tíma
• Hægsta mánaðarliga gjaldið er 177 kr. fyri hvønn tíma
• Tú rindar í mesta lagi fyri 30 tímar um mánaðin

ERT TÚ PENSJÓNISTUR Í HJÚNALAGI

Ert tú pensjónistur í hjúnalagi, rokna vit títt gjald soleiðis:

• Er inntøkan lægri enn 22.500 kr., er eingin kostnaður
• Er inntøkan millum 22.500 kr. og 30.000 kr., rindar tú 30 kr. fyri hvønn tíma
• Fyri hvørjar 7.500 kr., inntøkan er hægri enn 30.000, rindar tú 3 kr. eyka fyri hvønn tíma
• Hægsta mánaðarliga gjaldið er 177 kr. fyri hvønn tíma
• Tú rindar í mesta lagi fyri 30 tímar um mánaðin

Vilt tú vita meira um gjald fyri heimarøkt, kanst tú lesa nærri í kunngerðini um heimatænastu og gjald fyri heimatænastu.

Kunngerð um heimatænastu og gjald fyri heimatænastu (logir.fo)

Vit veita okkara tænastu við tí fyri eyga at varðveita eitt virðiligt samskifti millum teg, tíni avvarðandi og okkara starvsfólk.

Í hesum sambandi mást tú gera tær greitt, at fært tú játtað heimarøkt frá okkum, verður títt heim samstundis okkara arbeiðspláss. Vit ynskja, at starvsfólk okkara skulu hava góðar arbeiðsumstøður, soleiðis at tey eru arbeiðsfør í so nógv ár, sum gjørligt. Tí kanna vit títt heim, áðrenn vit veita tær heimarøktina. Hetta fyri at tryggja okkum, at vit kunnu veita okkara tænastu undir tryggum umstøðum fyri teg og fyri starvsfólk okkara. Til dømis kann verða neyðugt at fáa til vega ymisk hjálpitól ella gera broytingar í heiminum, áðrenn vit fáa veitt tær tænastuna.

Áðrenn tú kanst fáa heimarøkt, er somuleiðis umráðandi, at títt heim er reint og ruddiligt, soleiðis at tað er atkomuligt hjá okkara starvsfólkum at veita tær tænastuna.

Tú og tíni avvarðandi hava ábyrgd av, at atkomuviðurskiftini uttandura eru í lagi. At atkomuviðurskiftini eru í lagi merkir millum annað, at nøktandi ljós er uttandura, at kavin er ruddaður, og at túnið er saltað, tá tørvur er á tí.

Roykir tú, seta vit sum krav, at tú luftar væl út, áðrenn vit koma í heimið, og at tú ikki roykir, meðan vit arbeiða.

Hevur tú húsdjór, skulu hesi vera í bandi, í búri ella í øðrum rúmi, meðan okkara starvsfólk eru inni, tí starvsfólk okkara kunnu hava ovurviðkvæmi ella vera bangin fyri djórum.

Ert tú eldri og hevur niðursettan førleika, og ger hetta tín bústað óhóskandi at búgva í, ber í summum førum til at tillaga bústaðin, soleiðis at hann hóskar til tín tørv. Í summum førum ber eisini til at lætta um gerandisdagin við hjálpartólum. Kunna teg nærri um hesar møguleikar umvegis leinkjurnar niðanfyri.

Ert tú fólkapensjónistur, kanst tú søkja um onnur tørvsmett tilboð frá Heilsu- og umsorganartænastuni. Les meira um hetta á síðu okkara um tørvsmett tilboð til fólkapensjonistar.

Almannaverkið – bústaðartillagingar (verður umsitið av Almannaverkinum)

Søk um hjálpartól ella bústaðartillaging

Tørvsmett tilboð til fólkapensjonistar

Les meira í faldara okkara um Heimatænastuna.

Heimatænastan