Lurta
Til lesiveik

Stutttíðarpláss til fólkapensjónistar

Tú kanst søkja um stutttíðarpláss, um tú ert heimabúgvandi fólkapensjónistur við tørvi á rehabilitering og røkt alt samdøgrið í eitt tíðarskeið, soleiðis at tú kanst megna tín gerandisdag og framhaldandi verða verandi heima.

Heilsu- og umsorganartænastan hevur í løtuni tvey ymisk sløg av stutttíðarplássum:

  • umlætting
  • samdøgursrehabilitering

Hevur tú Samleikan, skalt tú søkja um stutttíðarpláss á Vanganum.

Søk um stutttíðarpláss á vanganum

Hevur tú ikki skrásett tær Samleikan, ið krevst fyri at søkja á Vanganum, kanst tú gera tað á heimasíðuni hjá Samleikanum.

Fært tú av onkrari orsøk ikki nýtt Vangan, kanst tú fylla út umsókn á heimasíðuni og senda hana til heilsuhusid@torshavn.fo

ella lata hana inn á Snarskivuni, á Vaglinum 11, í Tórshavn. Sendir tú umsóknina inn sum teldubræv, skalt tú minnast til at viðmerkja »Umsókn um stutttíðarpláss« í evnisteigin.

Tað er ein fyrimunur at søkja á Vanganum, tí samskiftið á Vanganum er bæði skjótari og tryggari. Á tínari vangasíðu hevur tú harafturat møguleika fyri at fylgja við í viðgerðargongdini.

Niðanfyri kanst tú lesa um stutttíðarplássini í Tórshavnar kommunu og kunna teg um, hvussu tú søkir.

Heimasíðan hjá Samleikanum (samleikin.fo)

Søk um stutttíðarpláss



Umlættingarpláss
Hvat eru umlættingarpláss ætlað til?

Ert tú heimabúgvandi fólkapensjónistur í Tórshavnar kommunu, og tørvar tær umlætting, kanst tú søkja um at koma til umlættingar hjá Heilsu- og umsorganartænastuni.

Umlættingin er ætlað avvarðandi, ið røkta eldri borgara heima og hava tørv á at fáa ein lætta í gerandisdegnum. Umlættingartíðarskeið vara miðalroknað 3 vikur.

Hvør kann fáa umlætting?

Allir heimabúgvandi fólkapensjónistar og avvarðandi, ið hava
tørv á umlætting, kunnu fáa játtað umlætting frá Heilsu- og umsorganartænastuni í eitt tíðarskeið.

Hvar gongur umlættingin fyri seg?

Í løtuni eru 10 stutttíðarpláss. Vit hava 7 pláss á Umlættingarheiminum og 3 pláss
á Boðanesheiminum.

Tín førleiki er avgerandi fyri, um vit kunnu játta tær umlætting á
Umlættingarheiminum ella á Boðanesheiminum.

Tá Demensdepilin á Tjarnargarði og Umlættingar- og rehabiliteringsdepilin (URD) verða
klárir at taka í nýtslu, staðseta vit stuttíðarplássini hjá Heilsu- og umsorganartænastuni har.

Hvussu søki eg?

Tú kanst søkja um stutttíðarpláss á Vanganum. Í umsóknini verður tú millum annað biðin um at greiða frá tínari støðu, orsøkina til umlættingina og hvat tíðarskeið tær tørvar umlættingina.

Hevur tú Samleikan, skalt tú søkja um stutttíðarpláss á Vanganum.

SØK UM STUTTTÍÐARPLÁSS Á VANGANUM

 

Hevur tú ikki skrásett tær Samleikan, ið krevst fyri at søkja á Vanganum, kanst tú gera tað á heimasíðuni hjá Samleikanum.

Fært tú av onkrari orsøk ikki nýtt Vangan, kanst tú fylla út umsókn á heimasíðuni og senda hana til heilsuhusid@torshavn.fo

ella lata hana inn á Snarskivuni, á Vaglinum 11, í Tórshavn. Sendir tú umsóknina inn sum teldubræv, skalt tú minnast til at viðmerkja "Umsókn um stutttíðarpláss/umlætting" í evnisteigin.

Tað er ein fyrimunur at søkja á Vanganum, tí samskiftið á Vanganum er bæði skjótari og tryggari. Á tínari vangasíðu hevur tú harafturat møguleika fyri at fylgja við í viðgerðargongdini.

Heimasíðan hjá Samleikanum (samleikin.fo)

Søk um stutttíðarpláss/umlætting

Hvat hendir, tá ið eg havi søkt?

Eina ferð um mánaðin viðgera vit allar umsóknir um umlætting. Hava vit fleiri umsóknir enn tøk pláss, játta vit umlætting eftir tørvi. Tá kann verða ávís bíðitíð, áðrenn vit játta tær eitt pláss.

Vit játta umlætting eftir tørvi. Tað vil siga, at vit gera eina fakliga meting í hvørjum einstøkum føri og játta umlætting til borgararnar við størstum tørvi. Fakliga metingin tekur støði í tínari umsókn. Hava vit ivamál í hesum sambandi, setur ein visitator seg í samband við teg ella tíni avvarðandi fyri at avtala eina heimavitjan.

Játta vit tær eitt umlættingarpláss, fært tú svar á Vanganum og í MínBoks.

Kostar eitt umlættingarpláss?

Ja. Sambært kunngerðini um heimatænastu og gjald fyri heimatænastu skalt tú sum borgari rinda fyri umlættingarplássið.

Tú rindar eitt samdøgursgjald á 134 kr. fyri vistarhaldið frá fyrsta degi. Gjaldið rindar tú eina ferð um mánaðin fyri umlættingina, sum er veitt mánaðin fyri.

Kunna teg nærri um gjald fyri umlætting í kunngerðini um heimatænastu og gjald fyri heimatænastu.

Kunngerð um heimatænastu og gjald fyri heimatænastu (logir.fo)

Umráðandi at vita, tá tú fert til umlættingar

Tá vit hava játtað tær umlætting, senda vit tær ein lista, ið greiðir frá, hvat tú skal minnast til at hava við tær til umlætting.

Hetta skalt tú minnast at hava við tær til umlætting:

  • Klæðir, ið eru navnamerkt
  • Góð útiklæðir
  • Skógvar (bæði úti- og inniskógvar)
  • Sápu, hársápu og annað, sum tú vanliga nýtur til persónliga røkt
  • Hjálpitól, so sum gangistól (rollator), hoyritól, blæur, stomiposar og annað, tær tørvar
  • Ein nýggjan og fullfíggjaðan heilivágslista (hann kanst tú fáa frá tínum lækna)
  • Heilivág og annað tílíkt til tíðarskeiðið, tú ert til umlætting
  • Heilivágseskjur, um tú fært annan heilivág, sum ikki er skamtaður á apotekinum
  • Protein- og sondukost, um tú vanliga brúkar hetta
  • Journalupplýsingar frá sjúkrahúsi, kommunulækna ella serlækna, sum eru viðkomandi fyri tíðina, tú ert til umlætting
  • Møguliga kontaktbók millum teg og heimarøktina

Fært tú aðrar tænastur frá Heilsu- og umsorganartænastuni, er umráðandi at boða Heilsu- og umsorganartænastuni frá, at tú fært til umlætting, og at tænasturnar tí skulu halda uppat fyribils. Tænastur, sum fyribils skulu halda uppat, kunnu til dømis fevna um matartænastu, reingerðartænastu, dagtilboð, heimahjálp ella aðrar fastar avtalur.

Somuleiðis er umráðandi at boða frá, tá tú ynskir, at hesar tænastur skulu halda fram aftur.

Tá umlættingin er av

Tá umlættingin er av, hjálpa starvsfólkini tær at pakka, um tørvur er á tí. Vit gera avtalu við teg ella tíni avvarðandi um, nær tú verður heintað.

Onnur kunning

Les um minnislistarnar frá Umlættingarheiminum og Boðanesheiminum við at trýsta á leinkini niðanfyri.

Minnislisti frá Umlættingarheiminum

Minnislisti frá Boðanesheiminum

Samdøgursrehabilitering
Hvør kann fáa samdøgursrehabilitering?

Tá tú søkir um stutttíðarpláss, kanst tú søkja um samdøgursrehabilitering. Samdøgursrehabiliteringin er til borgarar, sum hava verið sjúkir, ella sum spakuliga hava mist førleikan og hava tørv á miðvísari venjing og røkt alt samdøgrið fyri at megna gerandisaktivitetir aftur. Talan er um eitt styttri rehabiliteringsskeið, sum varir 2 til 12 vikur. Endamálið er, at tú fært ein góðan gerandisdag, tá tú kemur aftur til hús, og at tú megnar gerandisdagin á best møguligan hátt.

Hvussu søki eg?

Tú kanst søkja um samdøgursrehabilitering við at útfylla umsóknarblaðið á Vanganum. Í umsóknini verður tú millum annað biðin um at greiða frá tínari støðu, orsøkina til at tú søkir, og nær tú ynskir samdøgursrehabilitering.

Hevur tú Samleikan, skalt tú søkja um stutttíðarpláss á Vanganum.

Søk um stutttíðarpláss á vanganum

Hevur tú ikki skrásett tær Samleikan, ið krevst fyri at søkja á Vanganum, kanst tú gera tað á heimasíðuni hjá Samleikanum.

Fært tú av onkrari orsøk ikki nýtt Vangan, kanst tú fylla út umsókn á heimasíðuni og senda hana til heilsuhusid@torshavn.fo

ella lata hana inn á Snarskivuni, á Vaglinum 11, í Tórshavn. Sendir tú umsóknina inn sum teldubræv, skalt tú minnast til at viðmerkja "Umsókn um stutttíðarpláss/samdøgursrehabilitering" í evnisteigin.

Tað er ein fyrimunur at søkja á Vanganum, tí samskiftið á Vanganum er bæði skjótari og tryggari. Á tínari vangasíðu hevur tú harafturat møguleika fyri at fylgja við í viðgerðargongdini.

Heimasíðan hjá Samleikanum (samleikin.fo)

Søk um stutttíðarpláss/samdøgursrehabilitering

Hvat hendir, tá eg havi søkt?

Tá tú hevur søkt, setur ein terapeutur seg í samband við teg og avtalar eina heimavitjan. Saman við tær og tínum avvarðandi ger terapeuturin eina fakliga meting um tín tørvi á samdøgursrehabilitering.

Vit viðgera allar umsóknir um samdøgursrehabilitering á mánaðarligum upptøkufundi.

Tá vit hava viðgjørt tína umsókn, fært tú svar á Vanganum og í MínBoks.

Umráðandi at vita, tá tú fert til samdøgursrehabilitering

Tórshavnar kommuna bjóðar eitt tvørfakligt og miðvíst tilboð, soleiðis at tú kemur fyri teg aftur. Her arbeiða sjúkrarøktarfrøðingar, ergoterapeutar, fysioterapeutar, heilsurøktarar og heilsuhjálparar saman um at hjálpa tær.

Saman við tær seta vit mál fyri, hvat tú skalt fáa burtur úr samdøgursrehabiliteringini. Málini taka støði í teimum ynskjum, tú hevur fyri tín gerandisdag. Saman leggja vit eina ætlan, sum ítøkiliga lýsir, hvussu vit røkka málunum.

Evni í ætlanini kunnu vera:

  • Hvat eigur tú at klára fyri at megna gerandisdagin?
  • Hvørja likamliga venjing skalt tú gera?
  • Hvørjum sosialum og mentanarligum virksemi vilt tú taka lut í?
  • Hvussu røkir tú á bestan hátt egnu heilsu?
  • Tørvar tær stuðul til at broyta matvanar?
  • Hvørji hjálpartól tørvar tær?
  • Tørvar tær vegleiðing og stuðul til at liva við varandi sjúku?

Fyrstu 10 dagarnar brúka vit í felag til at meta um, hvørt samdøgursrehabilitering er rætta tilboðið til tín. Vit hava eisini eina samrøðu saman við tínum avvarðandi, har vit saman avtala, hvussu leingi tú ert í samdøgursrehabiliteringini.

Í løtuni fer samdøgursrehabiliteringin fram á Boðanesheiminum. Samdøgursrehabiliteringin verður flutt á umlættingar- og rehabiliteringsdepilin URD, tá hann opnar.

Hetta skalt tú minnast at hava við til samdøgursrehabilitering:

  • Klæðir, ið eru navnamerkt
  • Góð útiklæðir eisini
  • Skógvar (bæði úti- og inniskógvar)
  • Sápu, hársápu og annað, sum tú vanliga nýtur til persónliga røkt
  • Hjálpitól, so sum gangistól (rollator), hoyritól, blæur, stomiposar og annað, tær tørvar
  • Ein nýggjan og fullfíggjaðan heilivágslista (hann kanst tú fáa frá tínum lækna)
  • Heilivág og annað líknandi til tíðarskeiðið, tú ert til samdøgursrehabilitering
  • Heilivágseskjur, um tú fært annan heilivág, sum ikki er skamtaður á apotekinum
  • Protein- og sondukost, um tú vanliga brúkar hetta
  • Upplýsingar frá sjúkrahúsi, kommunulækna ella serlækna, sum eru viðkomandi í fyri tíðarskeiðið, tú ert til samdøgursrehabilitering
  • Dýnu og kodda
Kostar samdøgursrehabilitering?

Ja. Sambært kunngerðini um heimatænastu og gjald fyri heimatænastu, skalt tú sum borgari rinda fyri samdøgursrehabiliteringina.

Tú rindar eitt samdøgursgjald á 134 kr. fyri vistarhaldið frá fyrsta degi. Gjaldið rindar tú eina ferð um mánaðin fyri samdøgursrehabiliteringina, sum er veitt mánaðin fyri.

Kunna teg nærri um gjald fyri samdøgursrehabilitering í kunngerðini um heimatænastu og gjald fyri heimatænastu.

Kunngerð um heimatænastu og gjald fyri heimatænastu (logir.fo)

Tá samdøgursrehabiliteringin er av

Tá samdøgursrehabiliteringin er av, kunna vit teg um tilboð í Tórshavnar kommunu. Saman við tær leggja vit eina ætlan fyri, hvussu tú kanst viðlíkahalda førleikarnar, tú hevur endurvunnið.