Tórshavnar kommuna, Mentamáladeildin, bjóðar hervið út leigumálið at reka barrina í Reinsarínum og Perluni, Tórsgøta 3 og 5, í Havn. Raksturin av barrini verður hesaferð boðin út í trý ár frá 1. desember 2025 ella skjótast til ber.
Freistin at bjóða er mánadagin 5. januar 2026 klokkan 12.
Mentanarhølir í miðbýnum er stovnur undir Mentamáladeildini í Tórshavnar kommunu. Leiðarin hevur ábyrgd av at leggja dagliga virksemið til rættis sambært galdandi reglugerð.
Loyvishavari hevur ikki framíhjárætt, tá virksemið verður bjóðað út aftur.
Um Reinsaríið, Perluna og barrina
Reinsaríið er eitt spælistað, sum kann nýtast til konsertir og onnur mentanarlig tiltøk. Í Reinsarínum er eitt konserthøli við balkong. Pláss er fyri tilsamans 150 áhoyrarum. Reinsaríið lat upp 1. oktober 2014, og síðani tá hevur verið ein støðug røð av tiltøkum.
Perlan kann nýtast til ymisk tiltøk so sum fyrilestrar, konsertir, framsýningar, sjónleik, bókaframløgur og annað. Í Perluni er høli í tveimum hæddum. Pláss er fyri 150 standandi og 100 sitandi gestum.
Barrin er í Reinsarínum, umframt at barrdiskur og ávísir hentleikar eru í Perluni. Barrin er einans opin í sambandi við tiltøk um kvøldið og í vikuskiftunum. Barrin tekur sær av almennari skeinking í sambandi við tiltøk í Reinsarínum og Perluni. Harumframt er ynskiligt, at barrin tekur sær av skeinking í sambandi við viðkomandi tiltøk í Auluni í Finsen. Til hetta skal søkjast hissiniloyvi.
Treytir í sambandi við tilboðið
Tað hevur avgerandi týdning, at barrin stuðlar uppundir virksemið í Reinsarínum og Perluni, til gagns fyri báðar partar. Barrin skal hava sín egna samleika, sum verður týðiliga lýstur við skelting, búnum ella øðrum, soleiðis at kundin veit, hvør veitarin er.
Upplatingartíðir
Barrin skal vera opin í sambandi við tiltøk í Reinsarínum og Perluni og, tá ið til ber, í Auluni í Finsen. Barrin skal lata upp í seinasta lagi ein tíma, áðrenn tiltakið byrjar.
Loyvishavarin skal samstarva við leiðaran í mentanarhølunum um virksemi og um upplatingartíðir.
Starvsfólk
Loyvishavarin hevur síni starvsfólk, sum hann hevur ábyrgdina av, og hann skal syrgja fyri, at tey fáa neyðuga upplæring, áðrenn tey koma til arbeiðis. Loyvishavarin skal veita nøktandi tal av starvsfólki í samráð við leiðaran í mentanarhølunum.
Leigugjald (Loyvisgjald)
Loyvishavarin rindar 3000 krónur um árið í loyvisgjaldi.
El, hiti, reingerð o.t.
El, hiti og reingerð eru roknað við í loyvisgjaldinum. Mentanarhølir í miðbýnum tekur sær av reingerðini í hølunum sum heild og av at vaska gólvini, men loyvishavarin skal vaska barrina og køkin eftir hvørt tiltak og taka sær av uppvaski.
Tíðaravmarking
Raksturin av barrini verður boðin út í trý ár. Loyvishavarin hevur ikki framíhjárætt, tá virksemið verður boðið út av nýggjum.
Avhending og framleiga v. m.
Loyvishavarin kann ikki avhenda ella lata loyvið, herundir raksturin, upp í hendurnar á øðrum (framleiga).
Loyvir
Loyvishavari útvegar sær neyðug loyvir, herundir skeinkiloyvi v.m. Hetta er ein treyt fyri leigumálið.
Tilboð
Innihald í tilboðnum:
Tilboðsgevarin sendir inn eitt tilboð við í minsta lagi hesum upplýsingum:
- Tilboðsgevarin greiðir frá og veitir prógv fyri sínum royndum við / førleikum til at reka barr, kafé ella øðrum viðkomandi royndum
- Fíggjarætlan fyri rakstur av kaféini verður løgd við, har tilboðsgevarin váttar, at hann/hon hevur eitt veruligt fíggjarligt grundarlag undir rakstrinum av kaféini og hóskandi fíggjarstøðu til raksturin
- Tilboðsgevarin skal vísa á sannlíkindini fyri, at hann/hon hevur fortreytir fyri at fáa neyðugu loyvini, so sum handilsloyvi, skeinkiloyvi v.m.
- Harumframt greiðir tilboðsgevarin frá ætlanum og hugsanum um barrvirksemið, soleiðis at barrin stuðlar uppundir virksemið í Reinsarínum og Perluni í góðum samskifti við leiðaran.
- Eisini skal koma fram, hvørjar hugsanir tilboðsgevarin hevur um prísleguna í barrini.
Innsending av tilboði:
Tilboðsgevarin sendir inn tilboð við øllum kravdum upplýsingum. Tilboð kunnu sendast við telduposti til
torshavn@torshavn.fo. Minst til at viðmerkja »Mentamáladeildin - Barrvirksemi í Reinsarínum« í evnisteigin í teldupostinum.
5. Tilgongd
Kunning og spurningar
Møguligir tilboðsgevarar, sum hava spurningar ella ynskja at síggja hølini og umstøðurnar annars, kunnu venda sær til Boga Andreasen, leiðara, á tel 28 66 71 ella bogi@torshavn.fo.
Umsóknarfreist
Tilboð skulu vera Tórshavnar kommunu í hendi í seinasta lagi mánadagin 5. januar 2026 klokkan 12.
Viðgerð av innkomnum tilboðum
Øll tilboðini verða gjøgnumgingin, og kannað verður, um allar kravdar upplýsingar eru við. Tórshavnar kommuna tilskilar sær rætt til, men hevur ikki skyldu til, at vísa tilboðum frá sær, sum ikki hava kravdu upplýsingarnar. Tórshavnar kommuna tilskilar sær rætt til at vraka øll innkomin tilboð.
Tilboðsgevarar, sum verða mettir at samsvara best við treytirnar, verða bodnir hvør sær á fund við Tórshavnar kommunu at gjøgnumganga og viðgera tilboðið. Um mett verður neyðugt, kann Tórshavnar kommuna biðja um meira tilfar og fleiri upplýsingar.
Avgerð
Eftir fundirnar við tilboðsgevararnar tekur Tórshavnar kommuna avgerð um, hvønn tilboðsgevara sáttmáli verður gjørdur við.
Avgerðin verður tikin við støði í eini meting av, hvørji tilboð í mestan mun lúka treytirnar nevndar í pkt. 4. “Tilboð”, so sum royndir, fíggjarlig viðurskifti, tænastustig og møguleika at fáa neyðug loyvi til virksemið.
Avlýsing av tilboðstilgongdini
Tórshavnar kommuna tilskilar sær til eina og hvørja tíð rætt til at avlýsa tilboðstilgongdina heilt ella lutvíst.
Fyrivarni um ábyrgd
Dentur verður lagdur á, at Tórshavnar kommuna við at gera sáttmála við tilboðsgevara ikki hevur tikið støðu til handilsloyvi, eins og avgerðir um at játta skeinkiloyvi og møgulig onnur loyvi verða játtað av loyvismyndugleikunum eftir umsókn frá tilboðsgevara. Tórshavnar kommuna átekur sær sum útbjóðari ikki ábyrgdina av, at ávísur tilboðsgevari, sum sáttmáli er gjørdur við, fær neyðug loyvi til rakstur av barrini.
Sáttmálin um ruskinnsavning í Tórshavnar kommunu gongur út 30. september 2026, og tí verður arbeiðið nú bjóðað út av nýggjum. Tilboð skulu vera Tórshavnar kommunu í hendi í seinasta lagi mánadagin 4. august 2025 klokkan 13.
Ruskinnsavningin fevnir í høvuðsheitum um hesi øki:
Húsarhaldsburturkast
- Innsavning av húsarhaldsburturkasti í plastruskposum frá øllum húskjum í kommununi, og í hesum sambandi eisini bingjum frá privatum húskjum
- Útbering av húsarhaldsposum í rullum 2 ferðir um árið til øll húski í kommununi
- Innsavning av húsarhaldsburturkasti í vinnu/eykaposum frá húskjum, vinnu og stovnum
- Innsavning av húsarhaldslíknandi burturkasti í bingjum frá virkjum, stovnum og bingjuplássum
Vandamikið burturkast
- Innsavning av posum við serliga dálkandi / vandamiklum burturkasti frá húskjum í allari kommununi
- Útbering av posa til vandamikið burturkast 2 ferðir um árið til øll húski í kommununi
Papp, pappír og bleytt plast
- Innsavning av blandaðum pappi, pappíri og bleytum plasti frá húsarhaldum í allari kommununi (í felagsøkjum fer innsavningin fram í bingjum, meðan innsavningin frá húsarhaldum í øðrum økjum fer fram antin í posum ella í plastspannum)
- Innsavning av blandaðum pappi, pappíri og bleytum plasti í plastíløtum frá stovnum og virkjum
Lívrunnið burturkast
- Innsavning av lívrunnum burturkasti frá virkjum og handilsfyritøkum at lata til Førka í plastíløtum
Sáttmálatíðarskeiðið byrjar 1. oktober 2026 og kann vara heilt upp í 12 ár, um el-bilar verða nýttir. Annars er sáttmálatíðarskeiðið 8 ár.
Tórshavnar kommuna kann leingja sáttmálan eitt ár í senn upp til tríggjar ferðir við óbroyttum treytum.
Útbjóðingartilfar verður útflýggjað í telduposti og kann bíleggjast frá Tórshavnar kommunu við at senda teldupost til torshavn@torshavn.fo.
Allir fyrispurningar viðvíkjandi útbjóðingini skulu stílast við telduposti til johnerik@torshavn.fo, telefon 59 09 79 ella við telduposti til marius@torshavn.fo, telefon 21 53 09. Fyrispurningar kunnu ikki setast eftir 21. juli 2025.
Boðini skulu latast inn í afturlatnum brævbjálva til:
Tórshavnar kommuna
Vaglið 1
Postboks 32
FO-110 Tórshavn
Att. Kommunala Brennistøðin
Boðini skulu merkjast: »Tórshavnar kommuna: Útbjóðing av ruskinnsavning«.
Tilboð skulu vera Tórshavnar kommunu í hendi í seinasta lagi mánadagin 4. august 2025 klokkan 13 á Ráðhúsinum, Vaglið 1, FO-100 Tórshavn. Eftir hetta verða tilboðini latin upp, og tey, sum hava latið boð inn, kunnu vera til staðar, tá ið tilboðini verða latin upp.
Tórshavnar kommuna lýsir við hesum ein part av matrikkli 256 omanfyri Argjahamar til sølu til bygging av íbúðum og høli til vinnuvirksemi.
Freistin at lata inn tilboð uppá lendið er 25. september 2023 klokkan 12.
Tórshavnar kommuna hevur ment eina heildarætlan fyri part av matrikkul 256 oman fyri Argjahamar og í vár beyð Tórshavnar kommuna fyrsta økið út til bygging av íbúðarhúsum. Nú verður farið undir at bjóða næsta økið út. Lendið, ið verður boðið út, er øki 4, ið er á leið 6.708 m2 til støddar.
Lendið omanfyri Argjahamar er flokkað sum eitt øki, ið hóskar væl til býarvøkstur. Økið er í kommunuætlanini lagt av til framtíðar býarvøkstur saman við økinum við Stórutjørn. Heildarætlanin fyri Stórutjørn er í gerð, og tíðin er nú eisini búgvin til at taka økið á Argjahamri í nýtslu til býarmenning.
Heildarætlanin fyri Argjahamar fevnir um matrikkul 256, ið er 132.000 m2 til støddar. Útbodna økið er partur av hesum matrikkli. Lendið liggur omanfyri bústaðarøkið Klingurstjørn, Skúlan á Argjahamri, Dagstovnin á Hamrinum og bústaðarøkið á Argjahamri. Tað er týdningarmikið sambært heildarætlanini, at økið kemur at umboða ein breiðan málbólk í samfelagnum við ymiskum bústaðarsløgum, bústaðarstøddum og eigaraviðurskiftum. Heildarætlanin leggur harafturat upp til útvent virksemi, so sum einstaklingavirkir, smásølu og tænastur innan heilsuøkið.
Nakað av lendinum verður boðið út til privatar arbeiðstakarar at menna, og nakað verður boðið út sum kommunalar útstykkingar. Samlaða økið verður skipað í 7 bústaðarøki. Mett verður, at tá øll økini í heildarætlanini eru bygd, verður pláss fyri umleið 500 fólkum, ið svarar til eina hækking á 20% av verandi fólkatalinum á Argjum.
Yvirskipað fyri byggingina í øki 4 er at fáa eina bygging við í mesta lagi fýra hæddum, har vinnuligt virksemi skal gerast í niðaru hæddunum og íbúðum í erva.
Samlaða útboðstilfarið sært tú her:
Útboð av grundøki omanfyri Argjahamar - útboðstilfar
Mannagongd
Tilgongdin er soleiðis háttað, at tilboðsgevarar lata kommununi:
- Váttan frá peningastovni um tøka fígging til keyp av lendi
- Neyva frágreiðing um verkætlanina
- Frágreiðing um toymið, sum bjóðar
Tilboðini skulu latast inn á kommunala útboðsportalinum í seinasta lagi 25. september 2023 klokkan 12.
Fyri at kunnu lata tilboð inn á útboðsportalinum, má tilboðsgevi vera skrásettur brúkari. Tað er ókeypis at skráseta seg sum brúkara. Frameftir gongur øll kunning og samskifti fyri seg á útboðsportalinum.