Húsavørður til Bygningsrakstur

Tórshavnar kommuna søkir eftir einum húsavørði til Bygningsrakstur at byrja 4. mai 2026 ella eftir nærri avtalu.

Tú verður partur av toyminum í miðøkinum við dugnaligum húsavørðum, har vit leggja dent á fakligan kunnleika, virðing fyri hvørjum øðrum og gott samstarv.

Tú fært ábyrgd av húsavarðauppgávum á fleiri bygningum, har tú partvíst sjálv/-ur leggur arbeiðini til rættis og hjálpir annars til á øðrum bygningum eftir tørvi.

Í miðøkinum starvast ein formaður og 10 húsavørðar.

Tú skalt tola broytingar í mun til bygningar og økir.

Arbeiðsuppgávurnar fevna m.a. um:

• At hava umsjón og røkja bygningarnar og økini uttanum
• Rakstar- og viðlíkahaldsuppgávur sambært viðlíkahaldsskipanini innan m.a. el, vatn, hita, ventilatión, brunaviðurskifti og trygdarútbúnað
• Aðrar tænastuuppgávur
• Smærri umvælingar

Førleikakrøv

• Ynskiligt er at tú hevur útbúgving (so sum húsavørður, smiðjur, snikkari, elektrikari o.s.v.), ella hollar arbeiðsroyndir innan handverk
• Førleikar innan tekniskar skipanir kunnu verða ein fyrimunur
• Skalt megna at arbeiða sjálvstøðugt og í toymi
• Hevur góðan telduførleika
• Dugur at skriva og orða teg á føroyskum
• Hevur koyrikort til persónbil

Vit vænta, at tú:

• brennur fyri umsjón og góðum røkiskapi
• ert framfýsin og fyrikomandi
• hevur eyga fyri smálutum
• dugur at arbeiða skipað
• ert tænastusinnað/ur og hevur góð samstarvsevnir
• hevur lætt við at samskifta við børn, ung, vaksin og eldri

Vit bjóða tær m.a.:

• Eitt fast starv, har tú partvíst sjálv/-ur leggur arbeiðini til rættis
• Fjølbroyttar og avbjóðandi arbeiðsuppgávur
• Sosial og trivnaðar tiltøk
• Fleksiblar arbeiðstreytir

Setanarviðurskifti

Húsavørðurin vísir til formannin í miðøkinum. Starvið er fulltíðarstarv og verður sett sambært sáttmála millum Kommunala Arbeiðsgevarafelagið og Føroya Handverkarafelag / Landsfelag Handverkaranna ella Starvsfelagið.

Sambært §2 í barnaváttanarlógini hevur Tórshavnar kommuna skyldu til at fáa barnaváttan til vega, áðrenn umsøkjari verður settur í starv.

Samband

Um tú vilt vita meira um starvið, ert tú vælkomin at venda tær til Rúna Patursson, leiðara, á telefon 22 34 59 / runip@torshavn.fo ella Gisla Sveinbjørnsson, formann, á telefon 72 90 01 / gislis@torshavn.fo

Umsókn

Umsókn saman við møguligum prógvum, viðmælum og starvsroyndum skulu sendast til Tórshavnar kommunu í seinasta lagi 29. mars 2026.

Tú søkir starvið við at trýsta á grøna knøttin »Søk starvið«.

-----------------------------------

Um Bygningsrakstur

Bygningsrakstur tekur sær av dagligum viðlíkahaldi og røkt av bygningum, sum Tórshavnar kommuna eigur. Talan er um uml. 180 bygningar, sum m.a. fevna um dagstovnar, skúlar, ellis- og røktarheim, skrivstovur v.m.

Bygningsrakstur er skipaður sum stovnur undir Bygningsdeildini hjá Tórshavnar kommunu og hevur umleið 40 starvsfólk. Bygningsrakstur er skipaður í trý landafrøðilig økir við hvør sínum formanni.